በአፍሪካ ነጻ የንግድ ቀጣና ስምምነት (AfCFTA) ትግበራ ዙሪያ በድሬዳዋ ከተማ ሲሰጥ የቆየው ስልጠና ተጠናቋል።

የኢትዮጵያ የንግድና ዘርፍ ማኅበራት ምክር ቤት ከGIZ/AU እና ከድሬዳዋ ከተማ የንግድና ዘርፍ ማህበራት ምክር ቤት ጋር በመተባበር በአፍሪካ ነጻ የንግድ ቀጣና ስምምነት (AfCFTA) ትግበራ ዙሪያ በድሬዳዋ ከተማ ሲሰጥ የቆየው ስልጠና ተጠናቋል።
የስልጠናው ዋና ዓላማም የግሉ ዘርፍ ተዋናዮች የAfCFTA ስምምነት ፕሮቶኮሎችን፣ የንግድ ሂደቶችንና የአተገባበር መስፈርቶችን በተሻለ ሁኔታ እንዲረዱ በማድረግ፣ በአፍሪካ ገበያ ተወዳዳሪና ተጠቃሚ እንዲሆኑ ማብቃት መሆኑን የኢትዮጵያ የንግድና ዘርፍ ማህበራት ምክር ቤት ዋና ፀሐፊ ዶ/ር ቀነኒሳ ለሚ ተናግረዋል።
ኢትዮጵያ በAfCFTA ስምምነት በመጠቀም ምርቶችን ወደ ተለያዩ የአፍሪካ ሀገራት በመላክ አወንታዊ ውጤቶችን እያስመዘገበች ሲሆን፣ የአፍሪካን ሰፊ ገበያ በበለጠ ለመጠቀም የግሉን ዘርፍ አቅም ማሳደግ እንደሚገባም ዶ/ር ቀነኒሳ ጠቁመዋል።

በስልጠናዉ ላይ የተሳተፉ በድሬዳዋ ከተማ የሚገኙ ላኪዎች፣ አስመጪዎች፣ አምራቾች እና በኢንዱስትሪው ዘርፍ የተሰማሩ የግሉ ዘርፍ ተዋናዮች ስልጠናዉ ስለ አፍሪካ አህጉራዊ ነፃ የንግድ ቀጣና ስምምነቶች መሠረታዊ ሂደቶችና ሊሟሉ ስለሚገባቸው መስፈርቶች የተሻለ ግንዛቤ እንዳገኙና በቀጣይም በየሚሰማሩባቸው የንግድ ዘርፎች ላይ በትኩረት በመስራት በአፍሪካ ገበያ ያላቸውን ድርሻ ለማሳደግ እንደሚረዳቸዉ አስታዉቀዋል።
የኢትዮጵያ የንግድና ዘርፍ ማኅበራት ምክር ቤት የኢትዮጵያን የግሉ ዘርፍ በአፍሪካ ገበያ ተወዳዳሪና ተጠቃሚ ለማድረግ ከተለያዩ አጋር ድርጅቶች ጋር በመተባበር ተከታታይ የግንዛቤ ማሳደጊያና የአቅም ግንባታ ስልጠናዎችን እየሠጠ ይገኛል፤ ይህም ከአበይት ተልዕኮዎቹ አንዱ ነዉ።

