ዶ/ር ቀነኒሳ ለሚ ከድሬዳዋ ዩኒቨርሲቲ አመራሮች ጋር በዩኒቨርሲቲ እና በንግድ ምክር ቤቶች መካከል ሊኖር በሚገባ ትስስር ላይ ተወያዩ።

የኢትዮጵያ የንግድና ዘርፍ ማህበራት ምክር ቤት ዋና ፀሐፊ ዶ/ር ቀነኒሳ ለሚ ከድሬዳዋ ዩኒቨርሲቲ አመራሮች ጋር በዩኒቨርሲቲ እና በንግድ ምክር ቤቶች መካከል ሊኖር በሚገባ ትስስር ላይ ተወያዩ።
የዩኒቨርሲቲና የንግድ ም/ቤቶች ጠንካራ ግንኙነት በግሉ ዘርፍ የሚስተዋለዉን የዕዉቀትና ክህሎት ክፍተት ለመሙላት፣ አሁን ያለዉና ወደፊት የሚኖረዉ ኢንዱስትሪ የሚፈልገዉን የሰዉ ኃይል ለማፍራት የሚያስችል ስርዐተ ትምህርት ከግሉ ዘርፍ ጋር ተነጋግሮ ለመቅረፅና ለማሻሻል፣ በተማሪዎች ዘንድ የስራ ፈጣሪነት ስሜትን ለመፍጠርና፣ ጥቃቅንና አነስተኛ ኢንተርፕራይዞችን በምርምርና በቴክኖሎጂ ሽግግር ለማገዝ፣ የግሉን ዘርፍ ችግር የሚፈቱና በተግባር ሊተረጎሙ የሚችሉ ምርምሮችን ለመስራት ምቹ መደላድልን እንደሚፈጥር ዶ/ር ቀነኒሳ አብራርተዋል።

የድሬዳዋ ዩኒቨርሲቲ የምርምርና የቴክኖሎጂ ሽግግር ምክትል ፕሬዚዳንት ዶ/ር ተማም አወል በበኩላቸዉ ዩኒቨርሲቲዉ ከከተማ አስተዳደሩ የንግድ ኢንዱስትሪና ኢንቨስትመንት ቢሮ ጋር ብዙ ነገሮችን በጋራ እየሰራ ቢሆንም ትኩረቱ በኢንዱስትሪ ላይ ብቻ የተወሰነ መሆኑን ጠቅሰዉ ከዚህ በኋላ ከንግዱ ማህበረሰብ ጋር ለመስራት የኢትዮጵያ የንግድና ዘርፍ ማህበራት ም/ቤት በፈጠረዉ መነቃቃት ነፃ የቢዝነስ ማማከር አገልግሎት ከዚህ ጊዜ ጀምሮ ለመስጠት ቁርጠኛ መሆኑን አስረድተዋል።
የድሬዳዋ ዩኒቨርሲቲ የኢኮኖሚክስና ቢዚነስ ኮሌጅ ዲን ረዳት ፕሮፌሰር ኢዩኤል ኢዶሳ፣ የኢንዱስትሪ ትስስር ዳይሬክቶሬት ዳይሬክተር ዶ/ር እሸቱ መኮንን፣ እና ሌሎች የዩኒቨርሲቲዉ አመራሮች በዉይይቱ ላይ ተሳትፈዋል።
በዉይይቱ ላይ የተገኙት በድሬዳዋ ከተማ አስተዳደር የንግድ፣ኢንዱስትሪና ኢንቨስትመንት ቢሮ የንግድ ዘርፍ ኃላፊ አቶ አሚኖ ጠሃ እና በድሬዳዋ ከተማ አስተዳደር ም/ቤት የበጀት ኢኮኖሚ፣ንግድና ኢንዱስትሪ ጉዳዮች ቋሚ ኮሚቴ ሰብሳቢ ወ/ሮ አይናለም ተዘራ በበኩላቸዉ ዩኒቨርሲቲዉ እስካሁን ከከተማ አስተዳደሩ ጋር በርካታ ስራዎችን እየሰራ መሆኑን ገልፀዉ የከተማችን የግል ዘርፎች በተለይም የንግዱ ማህበረሰብ በአህጉራዊና አለም አቀፍ ገበያዎች ተወዳዳሪና ተጠቃሚ የሚሆኑበትን አቅም ከመፍጠር አንፃር ብዙ ድጋፎች ይጠበቁበታል ብለዋል።
ዶ/ር ቀነኒሳ ለሚ ከወይይቱ በኋላም
የዩኒቨርሲቲዉን የቴክኖሎጂ ማበልፀጊያ ማዕከል ጎብኝተዋል።

